Да го унапредуваме македонскиот јазик, како во образованието, во науката, така и во дигиталниот простор и истиот да го развиваме да биде во чекор со современиот свет. Во институтот за македонски јазик, Крсте Петков Мисирков на денот на одбележување на мајчиниот јазик, голем број професори, научници, упатија пораки за зачувување и негување на македонскиот јазик. Претседателката Сиљановска Давкова порача дека македонскиот јазикот е единствениот мост кој не води напред, и дека ги носи искуствата на сите миниати генерации и стремежите на оние кои ќе дојдат по нас.
„Мора постојано да се потсетуваме дека јазикот е темелот на идентитетот на чуварот на колективната меморија и единствениот мост кој не води напред во иднината“, изјави Гордана Сиљановска Давкова – претседател на Македонија.
„Треба да се потсетуваме не само на формите што ги носи јазикот туку и на суштината на таа есенција која ни ја носи јазикот. Пред се јазикот и после се друго“, изјави глумецот Никола Ристановски.
Директорката на Институтот, цитирајќи го Ноам Чомски, порача дека мајчиниот јазик е првиот прозорец кон светот.
„Јазикот не е само зборови. Тој е култура, традиција, цела историја која го прикажува општеството какво што е. Нашата задача е да го проучуваме и негуваме македонскиот јазик како мајчин и службен во македонската држава, но, истовремено да ги почитуваме нашите сограѓани и соседи од другите заедници во нивните стремежи за негување на своите мајчини јазици“, изјави Елена Јованова Грујовска.
Професорот и автор на првиот македонски етимолошки речник, Гоце Цветановски, потсети дека прашањето за јазикот не е само лингвистичко прашање туку и прашање на достоинство, идентитет и право на постоење.
„Мајчиниот јазик не може да се сведе само на една административна категорија тој е културна и духовна категорија, тој е јазикот во кој се оформува нашата прва мисла, првата приказна првата молитва“, професор доктор Гоце Цветановски научен советник во Институтот за македонски јазик.
Историски, македонскиот јазик постои со векови. Со решение на Народната влада на Федерална Македонија, на 5 мај 1945 година е усвоена азбуката на македонскиот јазик врз принципот еден глас – една буква, а на 7 јуни 1945, е усвоен и правописот на македонскиот јазик.
