Владата ќе одлучува кој од трите обвинителки и судијата од Кривичен ќе биде нов државен јавен обвинител. Позитивните мислења кои ги даде Советот на јавните обвинители ги чекаат официјално, а потоа еден од нив ќе оди како владин предлог до Собранието, потврди премиерот.
- „Чекаме да дојдат мислењата од Советот на ЈО, откако ќе дојдат официјално, ние како Влада ќе се произнесеме и ќе го дадаме нашиот предлог до Собранието“ најави Христијан Мицкоски.
В.Д. државната јавна обвинителка Анита Тополова Ислајловска, обвинителките Ленче Ристовска и Лидија Раичевиќ како и судијата Ненад Савески добија зелен картон за да ја продолжат трката за прв човек на јавното обвинителство.
Сите четворица кандидати според Советот се квалитетни и треба да добијат еднаква шанса пред Владата за да станат републички обвинител.
Од игра отпадна Владимир Панчевски кој според членовите не го исполнува условот од 10 години непрекинат работен однос или „активен“ и „непрекинат“ стаж до моментот на пријавување. Тој пак ја објави потврдата од Кривичниот суд дека од 2008 до 2020 година има непрекинат работен стаж и смета дека законот бара само поседување на соодветниот стаж како стекнато право.
По ваквата одлука тој преку социјалните меидуми првично најави кривична пријава за членовите, а потоа побара институциите да постапат по добрен глас.
- „Оваа кривична пријава е одраз на трулиот судско – обвинителски систем и предизвик Јавното обвинителство и МВР да отворат постапка по допрен глас и да расчистат со контаминираните кадри кои незаконски одлучуваат потешко повредувајки ги правата на граѓаните, носат селективна правда и го рушат угледот на судскиот систем“ напиша Владимир Панчевски – поранешен судија.
Панчевски во минатото беше осуден на три ипол годишна затворска казна за злоупотреба на службената положба и овластувања поради злоупотреби со АКМИС системот, односно електронскиот систем за распределба на предмети кај судии.
Владата сега треба да се одлучи за еден од четворицата кандидати, а потоа предлогот да го достави до Собранието. Нов јавен обвинител се бира со поддршка од 61 пратеник.
