Нова средба со претставници од министерствата за енергетика и транспорт и врски е закажана за во четврток, откако денешните разговори не донесоа конкретни решенија за стопирање на изградбата на мини хидроцентрала на реката Блатешница, во виничко Блаце. Мештаните бараат да се стопира проектот бидејќи трасата на цевководот минува низ главниот водовод на селото и директно го загрозува водоснабдувањето и земјоделието. Според градоначалникот на Виница, Митко Костадиновски, барањата на жителите на Блатец се оправдани.
„Конкретни решенија моментално немаме, па затоа жителите продолжуваат со протестите, меѓутоа на повидок сме да имаме брзо решение. Според информации од жителите на селото, целата траса на концесионерите минува низ главниот водовод на селото од кое се снабдуваат со вода за пиење“, изјави градоначалникот на Виница, Митко Костадиновски.
И додека се бара начин проблемот да се реши институционално, на терен протестите продолжуваат. Веќе трет ден со рампа и жив штит жителите не дозволуваат движење на градежна механизација кон локацијата, стравувајќи од еколошки последици и нов бран иселување. За во петок најавуваат блокада на магистралниот пат Виница–Берово.
