Првиот заменик‑претседател на Владата и министер за европски прашања, Беким Сали, оствари средба со вршителката на должноста амбасадор на Соединетите Американски Држави во земјава, Никол Варнс, на која беше разговарано за билатералните односи, реформските процеси и регионалната стабилност.
Како што соопшти Кабинетот на министерот, на средбата било нагласено стратешкото партнерство меѓу двете држави, како и континуираната поддршка од САД во зајакнувањето на демократските институции и развојните политики. Сали ја истакнал посветеноста на Владата кон реализација на реформите во јавната администрација и судството, оценувајќи дека тие се суштински за подобрување на владеењето на правото, транспарентноста и услугите кон граѓаните.
Соговорниците разговарале и за значењето на регионалната стабилност како предуслов за мир, безбедност и економски напредок.
-Двете страни ја реафирмираа подготвеноста за понатамошно продлабочување на билатералната соработка, се наведува во соопштението на Министерството за епропски прашања.
