Транспарентноста во активностите на локалната самоуправа е важна основа за демократските процеси во земјата, а нормално и на локално ниво, оценува Општина Дебар, која презема активности за зголемување на нивото на транспарентност, посебно кога станува збор за одобрување на урбанистички планови.
Токму за оваа цел, општинските институции објавија повик преку кој се даваат информации во однос на постапките за одобрување на урбанистичките планови.
Општина Дебар, во духот на новото отворено, транспарентно и соработничко управување со граѓаните, најавува дека повторно ќе организира јавна презентација и јавна анкета во врска со нацрт-планот: „Урбанистички план за село Рајчица – изработка на Блок 1 и Блок 2, Општина Дебар“, со цел да се обезбеди целосна вклученост и добивање мислења од граѓаните и заинтересираните страни.
-Овој процес има за цел да обезбеди секој жител и заинтересирана страна да има можност да биде добро информиран за содржината на урбанистичките планови, да ги изрази своите мислења и предлози и да придонесе во обликувањето на просторното планирање во нашата општина. Општина Дебар ја нагласува важноста од учеството на граѓаните и ги поканува сите да го дадат својот придонес во овој процес, велат од општината.
Додаваат дека, градоначалникот Фисник Меља и општинскиот совет се посветени на максимална транспарентност во врска со ова прашање. Според нив, транспарентноста е секогаш неопходна.
Со оваа активност, Општината ги охрабрува граѓаните активно да учествуваат во процесот, со пораката дека „заедно градиме подобра заедница и одржлив урбан развој за сите“. Оваа практика, според најавата, ќе се применува и на идните планови на територијата на градот.
Локалната самоуправа презеде конкретни активности со цел годинава, по повеќе од две децении, да усвои генерален урбанистички план, од кој зависи развојот на општината.
