А што носи потпишувањето на колективните договори во разните дејности покажуваат и примерите во високото образование. Откако се потпишаа во универзитетите, сега на ред е да се потпише истото и со Македонската академија на науки и уметности. Спикерот Гаши информира дека постапката е во завршна фаза. Тој оценува дека тоа ќе претставува значаен чекор и дополнително институционално зајакнување на научната дејност. Гаши не прецизираше дали договорот ќе опфати и зголемување на платите, посочувајќи дека тие прашања не се во негова директна надлежност.
Претходно, Собранието потпиша колективни договори со синдикатите на пет јавни универзитети – „Гоце Делчев“ во Штип, Универзитетот на Тетово, „Св. Климент Охридски“ во Битола, „Мајка Тереза“ во Скопје и „Св. Апостол Павле“ во Охрид.
Овој потег се оценува како важен исчекор за високото образование, со кој сите јавни универзитети добиваат колективни договори, поставувајќи основа за поодржлив, поправичен и поконкурентен систем. Колективните договори се сметаат за клучен механизам за унапредување на условите за работа и зајакнување на квалитетот во академската и научната сфера.
