Македонските и српските истражни органи соработуваат за да се докаже поврзаноста на уапсените и фирмите со дозволи за медицински канабис. Се испитува дали запленетата марихуана тешка пет тони, во Србија, потекнува токму од фирмите во Македонија од кои беа одземени 40 тони. Се собираат докази, а се сослушуваат и сведоци соопштија од Обвинителството за гонење организиран криминал и корупција.
- „Во насока на целосно утврдување на фактите и околностите, предметниот обвинител од ОЈО за ГОКК е во комуникација со Обвинителството за организиран криминал на Република Србија, со цел размена на информации од значење за постапката што ќе помогнат да се утврди евентуална поврзаност на двата случаи и потеклото на марихуаната. Воедно, јавниот обвинител од ОЈО ГОКК презема и други дејствија согласно своите законски надлежности, вклучително и сослушување лица во својство на сведоци, со цел прибирање докази и факти релевантни за постапката..“ велат од ОЈО за ГОКК.
Обвинителите велат дека континуирано преземаат активности во соработка со МВР и Комисијата за одобрување на одгледување на канабис за медицински цели, во рамките на Министерството за здравство.
Сомнежите се дека скопската „Алфафарм“ и струмичката „ЦБД Медплант“, од кои беше заплета околу 40 тони марихуана и шишиња недоработено масло од канабис, не ги почитувале посебните стандарди за поседување, производство, набавка и отуѓување.
Владата на утрешната седница треба да донесе одлука што ќе им ги отвори вратите на истражителите во околу 60-тина фирми за одгледување на марихуана за медицински цели. Очекувањата на премиерот Мицкоски се дека ќе бидат запленети уште најмалку 60 или вкупно 100 тони марихуана.
Тој откри дека цветовите од канабис биле тврдо пресувани и такви не може да се користат за производство за масло за медицински цели, а дали тоа се правело со умисла или друга цел, истрагата треба да даде одговор.
Истрагата се прошири до македонските фирми откако во Србија беше уапсен Иван Драгниќ , кој се јавува како косопственик во скопската фирма. Струмичката „ЦБД Медплант“ е во сопственост на Христијан Котев, чиј татко во периодот кога ја отвориле фирмата бил претседател на огранокот на СДСМ во Ново Село.
