Од росоманското село Сирково стартуваше 9. традиционално зимско искачување на врвот Клепа, висок 1.150 метри надморска височина. Организатори на настанот се „Клепа Росоман“ – Росоман заедно со „Грин пауер“ и „АЗОТ“ од Велес и општините Росоман и Градско.
Како што соопштија организаторите на планинарската акција, како покровители се приклучуват и градоначалниците на општините Росоман и Градско, низ чија територија поминува патеката, а како помагатели секоја година се приклучува логистичкиот дел на Армијата и домашни винарии.
– Целта на акцијата пред сè е меморијална, за да се оддаде почит на прерано загинатите планинари Калина и Александар на врвот Кајмакчалан, да се промовира врвот Клепа, како и да се манифестира заедничка соработка помеѓу планинарските клубови и друштва со општините Росоман и Градско, додадоа организаторите на искачувањето на Клепа.
Блаже Мелов од Кавадарци, долгогодишен и искусен планинар, рече дека лично ги познавал Калина и Александар и дека во нивна чест веќе неколкупати учествува во ова искачување.
– Сите ние би сакале денеска со нас да беа и Калина и Александар. Во нивна чест и сеќавање на убавите моменти што ги поминавме заедно, денеска чекориме кон Клепа и ги чуваме спомените за нив. Раскажуваме за нашите заеднички планинарски доживувања, емотивно раскажа Мелов.
Росоманскиот градоначалник Ѓорѓи Крстевски информираше дека Советот на Општина Росоман и локалната самоуправа и оваа година се јавуваат како покровители на настанот.
– Со поддршката на овој настан продолжуваме да ја поттикнуваме спортската рекреација, планинарството и активниот начин на живот, како и промоцијата на природните убавини на нашата општина. Клепа е дел од нашиот природен идентитет, а ваквите настани се можност за заедништво, здравје и промоција на општина Росоман, сподели градоначалникот.
