Владата отвора ново поглавје во борбата против сивата економија. Со новиот закон за работно ангажирање на лица, кој стапи на сила од 1 јануари 2026 година, се создаваат повеќе работни места, поголема заштита за работниците и постабилна и предвидлива деловна клима за компаниите. Работењето на црно практично ќе се сузбие со отворањето на можноста за дополнителен ангажман на пензионерите, но и на студентите и младите чиј сезонски но и секаков друг вид работен ангажман ќе биде со јасни права и обврски. Новиот модел според надлежните овозможува пофлексибилен и поедноставен начин за нивно дополнително легално ангажирање, создавајќи јасна правна рамка и поедноставување на електронските процедури во делот на пријавувањето, одјавувањето и уплатата на придонеси.
„Корисниците на гарантирана минимална помош, не ги губат социјалните и детските права, невработените не се бришат од евиденција и не го губат паричниот надоместок, пензионерите го заджуваат правото на пензија, а студентите и учениците ги задржуваат правата од образовниот систем“, изјави Бесар Дурмиши – министер за економија и труд.
Во првата фаза Законот ги опфаќа дејностите во кои сивата економија е најизразена, како што се земјоделството, шумарството, рибарството, објектите за храна и дејностите во домаќинствата. Се очекува бенефит за вкупно 17,400 работници, од кои 12,000 сезонски во секторот земјоделие и околу 5400 непријавени во туризмот, угостителството и услугите.
„Податоците на Државниот завод за статистика покажуваат дека во 2024 година во земјава имало речиси 694 илјади вработени, од кои приближно 85 илјади биле неформално ангажирани... Работодавачите добиваат флексибилност и поедноставни административни постапки, а работниците добиваат исплата по час, придонеси за пензиоско и инвалидско осигурување, дополнителен придонес за задолжително здравствено осигурување, во случај на повреда на работа или професионално заболување, како и јасна правна заштита на нивните права“,изјави Бесар Дурмиши – министер за економија и труд.
Законот беше работен од експерти од Германското друштво за меѓународна соработка, заедно со Агенцијата за вработување, Министерството за финансии и Управата за јавни приходи.
