По години јавен евроскептицизам, дилеми, проблеми со соседите за патот кон Унијата – Македонија повторно го враќа европскиот курс. Новото истражување на Институтот за демократија „Социетас Цивилис“ покажува драматичен пресврт во расположението 71% од граѓаните денес го поддржуваат членството во Европската Унија – речиси 10 процентни поени повеќе од лани.
Податоците откриваат неколку силни трендови: 71% поддршка за ЕУ, 14% евроскептици, што е значително намалување на неопределените и апатичните испитаници.
Особено важен е фактот дека 71% од етничките Македонци сега ја поддржуваат интеграцијата – 15% повеќе од лани – што ја намалува долготрајната етничка разлика.
Граѓаните остануваат поделени за тоа како понатаму: 27% бараат повторно преговарање на рамката, 24% ја поддржуваат промената на Уставот,поддршката за уставните измени е стабилна три години (20–24%), политичката неангажираност опаднала од 29% (2023) на 21% (2025).
Ова укажува дека граѓаните повеќе не се рамнодушни, туку бараат објаснување и дејствување.
51% од граѓаните сега ги гледаат преговорите како унапредување на законите и стандардите – пораст од 33 процентни поени во однос на 2024 година.
Тоа, според аналитичарите, е созреано разбирање на техничката природа на пристапувањето, а не само политичка битка.
Кога станува збор за формата на интеграција, податоците се уште поинтересни: 40% поддржуваат полноправно членство, 29% постепена интеграција со членство за 10–15 години, 19% фазна интеграција без непосредно членство. Ова покажува дека европскиот избор е доминантен, но тактиката околу него варира.
Во геополитичкото поле: ЕУ и САД и натаму се најдоверливи партнери, перцепцијата за влијанието на САД е зголемена за 6% од 2024,оптимизмот дека ЕУ ќе биде подготвена за проширување до 2030 се враќа на 50%, по падот на 33% минатата година. Ова, според истражувањето, покажува дека граѓаните силно реагираат на политичките сигнали од Брисел.
Истражувањето беше промовирано денеска во Собранието, во организација на Институтот за демократија и Фондацијата „Конрад Аденауер“, како дел од лонгитудинален проект започнат во 2014 година, кој преку идентична методологија секоја година ја мери јавната поддршка за евроинтеграцијата.
Анкетата е спроведена од 22 октомври до 5 ноември 2025 година, на национално репрезентативен примерок од 1003 испитаници, со статистичка грешка од ±3%.
