Градоначалничката на Општина Кисела Вода, Бети Стаменкоска Трајкоска, денеска оствари работна средба со Никола Веселинов, историчар и архивист од Конзерваторскиот центар – Скопје, Радомир Ивановиќ, археолог од Археолошкиот музеј, како и со пратеничката и етномузиколог Велика Стојкова Серафимовска.
Целта на средбата, како што се наведува во соопштението од Општина Кисела Вода, било истражување на потенцијалот на културното наследство на Кисела Вода, како најстара скопска општина, со посебен акцент на историските, археолошките и културните вредности на овој простор.
На средбата било договорено започнување стручна иницијатива во насока на систематско собирање и обработка на податоци за археолошки наоѓалишта, историски локации, објекти од културно значење и локални традиции.
-Овие информации ќе бидат основа за изработка на културно-историско-археолошка карта на Општина Кисела Вода, која ќе претставува сеопфатен преглед на културното богатство на општината. Добиените податоци, во следен чекор, ќе бидат дигитализирани и објавени на официјалната веб-страница на Општината, со што ќе станат лесно достапни за граѓаните, учениците, истражувачите, но и за посетителите, со цел унапредување на локалниот културен туризам и подигнување на јавната свест за значењето на наследството – велат од Општина Кисела Вода.
Градоначалничката Стаменкоска Трајкоска истакнала дека оваа соработка е важен чекор кон валоризација на локалната историја.
-Кисела Вода поседува богато културно и археолошко наследство кое досега не е доволно систематизирано и презентирано. Со поддршка на врвни стручњаци од областа на историјата, археологијата и етномузикологијата, започнуваме процес кој ќе овозможи нашето наследство да биде истражено, документирано и достапно за јавноста. Нашата цел е да создадеме современа дигитална платформа која ќе ја приближи историјата до граѓаните и ќе ја позиционира Кисела Вода како значајна културна точка на мапата на Скопје – посочила градоначалничката Стаменкоска Трајкоска.
