Стопанската комора на Македонија побара разрешување на недоразбирањата помеѓу цементарницата Усје и граѓаните, поради револтот од енормното загаување на главниот град. Граѓаните тврдат дека најголем загадувач е токму фабриката сместена во близина на Скопје.
„Мора да се разговара. Мора да се најде начин, проблемите да се надминат на начин на кој што е единствено можен, да се седне на заедничка маса и да се решат. Ако треба и да се изгубат и денови и месеци, но тоа прашање да биде симнато од дневен ред“, изјави Бранко Азевски, претседател на СКМ..
Од друга страна менаџментот тврди дека цементара има интегрирана А лиценца и врши секојдневни мерења на загадувањето. Техничкиот директор Гоце Цветковски, уверува дека сите студии покажуваат дека Цементарата не загадува. Во одбрана на тезата, вели дека тие веќе една недела не прозиведуваат цемент поради индустријата која нема потреба од нивниот производ во зима.
„Компанијата работи со сите правила во согласност со националното законодавство со европските директиви како и секоја друга компанија од оваа индустрија во Европа. Усје работи на ист начин и дење и ноќе и во лето и во зима. Затоа прашањето зошто загадувањето е само во зима укажува на некој друг проблем“, изјави Гоце Цветковски, технички директор на Цементарница Титан УСЈЕ Скопје.
Граѓаните, пред два дена на протестот од иницијативата „Стоп за Усје“, побараа мерната станица на Усје да го мери квалитетот на воздухот, а резултатите од мерењата да бидат достапни и да ги видат сите граѓани. Тие побараа и построги казни за фабриката и да се тргне употребата на отровните горива кои треба да се заменат со природен гас и водород.
