Македонија, официјално ќе има трет мобилен оператор, Фор ај Џи ги уплатил потребните средства за добивање на дозволата за работа. Оваа информација ја сподели премиерот Христијан Мицкоски по средбата со сопственикот на компанијата, Галерт Џашаи, во рамки на Светскиот економски форум во Давос.
Компанијата најави дека ќе инвестира над 100 милиони евра во поставување на нова, модерна мобилна мрежа во Македонија.
„Кога ќе влезете во суштината ќе сфатите дека за да вие создадете општество кое што во иднина, озбилно, сериозно ќе ја користи вештачката интелеганција, потребни се неколку предуслови. Пред се, сигурна енергетска стабилност и развој, бидејќи сите оние дата центри имаат потреба од струја и второ ни требаат ИТ инженери, односно ни требаат инженери кои што ќе ја користат таа вештачка интелегенција за потребите на општеството и потребите на граѓаните“, изјави премиерот на Македонија, Христијан Мицкоски.
Според премиерот, ние како држава мора да сме во тек со времето, бидејќи овие процеси ќе бидат водечки во човештвото најмалку во следните 10 до 15 години.
Македонската делегација останува во Швајцарија, каде на форумот во Давос, ќе има нови билатерални средби до крајот на денот, и во текот на утрешниот ден.
Најавени се средби и со високи државни претставници и претставници на меѓународни организации, со цел забрзување на реформските процеси и обезбедување поддршка за клучните национални проекти.
„Граѓаните добиваат нова компанија, која што ќе нуди мобилни услуги и компанија која што сигурен сум дека ќе влијае позитивно во намалување на цените на услугите кои што мобилните оператори ги нудат за граѓаните во Македонија“, изјави премиерот на Македонија, Христијан Мицкоски.
Македонската делегација беше дел и од панелот за вештачка интелегенција на форумот во Давос, каде што се разговарало за иднината за воведување на вештачката интелегенција во процесите за поголема продуктивност.
