По премиерот, и министерот за здравство Азир Алиу смета дека локацијата на ГОБ „8-ми Септември“ е најдобра за нов клинички центар. Но, сепак последниот збор ќе го имаат експертите и Владата. Конечната одлука според министерот ќе се темели на анализи и експертски мислења, а не на политички калкулации. Според првиот човек во здравството, оваа опција ќе биде најевтина и најбрза. Последните проценки покажувале дека овој терен ги исполнува сите стручни, инфраструктурни и сообраќајни критериуми потребни за еден современ здравствен комплекс.
И додека се чека последната одлука за проектот за нов Клинички, здравствените власти работат на решавање на проблемите во постоечкиот. Вечниот проблем на пациентите и вработените – паркингот, во првите месеци од 2026 година ќе биде конечно решен, со дигитализиран паркинг. Ќе има 400 нови паркинг места и катна гаража на местото на модуларната пред Инфективна. Цената за вработените ќе остане иста, а пациентите и посетителите ќе плаќаат различно, но не поскапо уверува Алиу.
Министерот за здравство оцени дека во текот на 2025 година здравствениот систем е значително подобрен, но порача дека во наредната година мора да се работи уште поинтензивно. Иако се направени важни чекори, како што рече, проблемите не се целосно надминати и предизвиците и натаму остануваат.
Алиу најави продолжување на инвестициите во медицинска опрема и здравствена инфраструктура, со цел пациентите побрзо и поквалитетно да добиваат здравствена заштита, а здравствените работници да имаат подобри услови за работа.
