Клучна институција за заштита на правата на граѓаните со месеци функционира без прв човек, а политички договор за нејзино деблокирање сѐ уште нема. Претседателот на Собранието, Африм Гаши, денеска оцени дека состојбата со неизборот на народен правобранител е недозволива и апелираше до пратеничките групи итно да се изнајде политичка волја за избор.
На последниот брифинг со новинарите во оваа календарска година, Гаши посочи дека процедурално Собранието го направило сѐ што е потребно, но дека проблемот е во обезбедувањето на потребното двојно мнозинство, односно Бадентеровиот принцип.
Комисијата за избори и именувања го предложи Фатон Сељами за народен правобранител. Владејачкото мнозинство располага со доволен број пратеници за избор, но не и со потребното Бадентерово мнозинство, поради што гласањето останува неизвесно.
Во меѓувреме, вчера, вработените во Народниот правобранител алармираа дека институцијата е во сериозна финансиска и функционална блокада, откако од јули, по пензионирањето на омбудсманот Насер Зибери, Собранието сѐ уште не избра нов раководител. Тие посочија дека три месеци не се плаќа кирија, а од јануари 2026 година постои ризик да нема исплата на плати и придонеси, што може целосно да ја парализира институцијата. Вработените предупредуваат дека без избор на народен правобранител не може да се обезбеди законско функционирање и заштита на правата на граѓаните.
Гаши оцени дека од државен аспект е несериозно ваква институција да остане без раководство и најави дека ќе вложи личен напор за надминување на состојбата, а доколку не се постигне договор – да се бараат и алтернативни решенија.
Покрај изборот на народен правобранител, Гаши се осврна и на изборот на нови членови на Судскиот совет. Тој најави дека постапката ќе продолжи согласно новиот Закон за судскиот совет, кој треба да биде донесен во вторник, на 30 декември.
Во однос на измените на Кривичниот законик, претседателот на Собранието најави дека тие ќе се најдат на дневен ред во јануари и тоа во редовна постапка. Според него, станува збор за системски закон кој бара темелна и транспарентна расправа, без скратени постапки, со цел да се обезбеди поширока јавна и стручна дебата.
На брифингот беше отворено и прашањето за Анкетната комисија за случајот Кочани. Иако постапката е формално започната, Комисијата сѐ уште не е конституирана, бидејќи партиите не доставиле предлози за членови, а со тоа нема ниту избран претседател, кој согласно процедурите го предлага опозицијата. Без комплетиран состав, останува неизвесно кога Комисијата ќе започне со работа.
