Беким Сали и Мухамет Хоџа и официјално избрани за нови министри во Владата. Со 72 гласа ЗА Сали стана минситер за европски прашања, а Хоџа дојде на чело на министерството за животна средина и просторно плаирање.
Премиерот Христијан Мицкоски ги образложи предлозите, истакнувајќи дека изборот има за цел целосно екипирање на Владата и обезбедување континуитет во клучните ресори.
За Хоџа посочи дека неговото долгогодишно искуство во администрацијата е клучно за политиките на одржлив развој, додека за Сали нагласи дека неговиот претходен министерски и пратенички ангажман ќе придонесе за поефикасна координација на евроинтеграцискиот процес.
Премиерот истакна дека сега поранешниот министер за европски прашања, кој денеска беше разрешен, Орхан Мутрезани останува дел од владиниот тим, тој ќе биде дел од кабинетот на премиерот за исполнување на реформите на европската агенда.
Додека владејачкото мнозинство даде целосна поддршка за кандидатите, опозицијата упати остри критики. Од СДСМ го оценија изборот како „политички театар“ за прикривање на неуспесите во реформите и економијата, а пак пратениците од ВМРО-ДПМНЕ рекоа дека веруваат во изборот на овие кадри.
Дебата меѓу пратениците од албанскиот блок највеќе се разви околу разрешувањето на Муртезани наместо поднесување оставка.
Изборот на новите членови на Владата дојде по локалните избори одржани во октомври откако Изет Меџити стапи на градоначалничката функција во Општина Чаир, кој ги извршуваше функциите прв вицепремиер и министер за животна средина и просторно планирање.
