Од први Февруари 2026 година пробните пораки за сообраќајните прекршоци за брзо возење, непрописно паркирање или непропуштање на пешак регистирирани со системот „Безбеден град“ ќе се претворат во реални казни. Од МВР потврдија дека е продолжен тест периодот на безбедносната мерка бидејќи се утврдени недостатоци кои мора да се корегираат.
„Безбеден град ќе започне да функционира од 01.02.2026 година на територија на Скопје, Тетово и Куманово, како и долж коридорите 8 и 10. Системот ќе продолжи да се развива и надградува и во иднина. „Безбеден град“ ќе стане „Безбедна држава“ и ќе го регулира сообраќајот низ целата држава. Еволуцијата на системот „Безбеден град“ ќе биде исклучително важна инвестиција во безбедноста на сите граѓани и цела држава кој ќе спасува животи, ќе го регулира сообраќајот а ќе ги санкционира сите оние кои не сакаат да ги почитуваат правилата на сопствена штета и штета на другите учесници со сообраќајот.“ – изјави портпаролот на МВР, Гоце Андреевски.
Со одложувањето се очекува да се надминат сите недостатоци кои се појавија изминативе денови во тест периодот. Големи реакции имаше за опомената која ја добиле граѓани кои ја надминале брзината само за 1, 2 или три километри на час од дозволената брзина, како и камери кои воопшто не регистрирале прекршок иако бил направен. Во други случаи пак стигнувале казни иако сопственикот воопшто не го возел своето возило. МВР размислува за праг на толеранција односно мало надминување на ограничената брзина.
„Со почетокот на тест фазата не се применуваат прагови на толеранција. Тоа е свесна одлука заради проверка на прецизноста на системот, калибрацијата и целокупниот процес од детекција до документ. За редовната примена е предвидено да се донесе решение според европските стандарди и практики и се очекува тогаш да се утврди и прагот на толеранција кој ќе биде во интерес на граѓаните. Целта секако не е МВР да казнува за минимални надминувања, туку да ги спречува опасните брзини и безобѕирни употреби на моторни возила кои предизвикуваат сообраќајни незгоди кои одземаат човечки жртви.“ – изјави портпаролот на МВР, Гоце Андреевски.
За да профункционира системот Сејф Сити во Собранието треба да се донесат измени на пет закони – законот за прекршоци, законот за безбедност на сообраќајот на патиштата, законот за извршување санкции, законот за возила и Кривичниот законик. „Безбеден град“ има за цел да ја зголеми безбедноста во сообраќајот преку камери кои автоматски ке ги евидентираат прекршоците. Системот пробно започна да функционира на 1 декември 2025 година во Скопје и уште во првиот ден се регистрираа над сто илјади прекршоци.
