Овој месец базната инфлација е малку поголема од претходните месеци. Инспекторатот повторно на терен ќе ги проверува маркетите, за да се спречи нивно картелско здружување, изјави премиерот Христијан Мицкоски на прашањата на медиумите за висината на базната инфлација и за изречените казни за маркетите заради нивно картелско здружување и договорно утврдување цени.
– Точно е дека овој месец базната инфлација е малку поголема од претходните. Тоа претежно се должи во делот на овошјето. Тоа го анализираме. Изтовремено, Државниот пазарен инспекторат повторно е излезе на пазарот, заедно со Комисијата за заштита на конкуренцијата, уште еднаш на направи детална инспекција на маркетите, да го констатираме нивното однесување. Имаме лоцирано кои се тие кои организираат такво однесување. Првичните казни беа предупредувачки. Очекувам да дојде до смирување во декември, јануари, февруари, а доколку не се случи тоа, ќе одиме чекор понатаму, рече Мицкоски без да прецизира за какви конкретни чекори станува збор.
Комисијата за заштита на конкуренцијата минатиот месец им изрече парични казни на пет трговски друштва и на ССК поради картелско здружување и договорно формирање цени. Трговските друштва беа казнети со по 50 илјади евра, додека Стопанската комора нешто над 18 илјади евра.
