На Меѓународниот ден против корупцијата, на 9 декември, не одбележуваме само симболичен ден, туку глобален повик за решителна акција против корупцијата која го попречува развојот и владеењето на правото во нашиот регион, стои во соопштението од Кабинетот на Заменик-претседателот на Владата за добро владеење Арбен Фетаи, во врска со одбележувањето на Меѓународниот ден против корупцијата.
Како Влада на Македонија, ја третираме борбата против корупцијата како трајна државна политика, заснована на мерливи резултати, а не на празни ветувања. Нашите граѓани заслужуваат транспарентни институции, враќање на украденото богатство и дигитални системи кои го прават коруптивното однесување невозможно.
За да се одбележи овој ден и да се унапреди регионалната соработка, утре, на 10 декември 2025 година, во хотелот DoubleTree by Hilton во Скопје ќе се одржи Регионалниот форум „Од политика до влијание: Унапредување на интегритетот и институционалните реформи на Западен Балкан“. Форумот, организиран од Владата на Македонија во партнерство со Шведска, Швајцарија, Европската Унија и УНОПС, ќе ги собере министрите за правда, раководители на антикорупциски институции, претставници на граѓанското општество, медиумите и меѓународните организации од целиот Западен Балкан.
Форумот се очекува да донесе нови заложби, продлабочена координација меѓу земјите од регионот и напредни пристапи во борбата против корупцијата, вклучително и користење на технологија и вештачка интелигенција.
Целосните детали ќе бидат објавени во официјалната комуникација за време на одржувањето на Форумот.
