Гувернерот на Народната банка Трајко Славески остварил посета на Банката на Англија во Лондон, заради засилување на билатералната соработка и размена на експертски искуства со една од најстарите централни банки во светот.
Во текот на посетата, како што соопшти денеска прес-службата на Народната банка, гувернерот остварил повеќе средби со високи претставници на Банката, меѓу кои и со гувернерот Ендрју Бејли.
– Особено значаен дел од агендата беа активностите поврзани со управувањето со златните резерви. Во тој контекст, беше организирана посета на трезорот на Банката на Англија, каде што Народната банка ги чува резервите во монетарно злато, заради подобро запознавање и увид во оперативните процедури за чување и ракување со монетарното злато, сигурносната заштита и во можностите коишто Банката на Англија ги нуди за пристап до пазарот за злато во Лондон, како најголем светски пазар преку шалтер на овој благороден метал, информира Народната банка.
Гувернерот одржал средби и со главниот економист на Банката на Англија, Хју Пил и со заменик-гувернерката Сара Бриден. На средбите се разговарало за актуелните предизвици во спроведувањето на монетарната политика и за технолошките иновации во секторот на финансии.
Посетата е во организација на Центарот за студии од областа на централното банкарство (CCBS) при Банката на Англија.
