Инфраструктурните проекти на коридорите 8 и 10 биле во фокус на средбата на заменик-претседателот на Владата и министер за транспорт, Александар Николоски, со амбасадорката на Хрватска, Нивес Тигањ. Николоски ја потенцирал можноста за интензивирање на економската и трговска соработка меѓу Македонија и Хрватска во интерес на двете земји.
Тој ги презентирал инвестициските планови на Владата за изградба и модернизација на патните и железнички коридори 8 и 10, како дел од европските транспортни мрежи. Посебен фокус бил ставен на изградба на брзата пруга на коридор 10, како предуслов за брз и ефикасен транспорт на добра кон Централна и Источна Европа, нагласувајќи ја можноста за учество на специјализирани компании од Хрватска во реализација на овој проект.
Николоски и Тигањ разговарале и околу актуелните политички прашања во земјата и регионот, евроинтегративниот процес и стабилноста на Западен Балкан. Ги потврдиле одличните односи меѓу Македонија и Хрватска и се согласиле истите да продолжат да се одржуваат на високо ниво во интерес на меѓусебната соработка и пријателство меѓу двете земји.
