Градоначалничката на Општина Кисела Вода, Бети Стаменкоска Трајкоска денеска имаше работна средба со делегација од Стопанската комора на Македонија-Турција (МАТТО). На овој работен состанок, информираат од нејзиниот кабинет, градоначалничката ги запозна гостите со развојните потенцијали на општината, тековните активности за унапредување на деловната клима и стратешките насоки кои ја позиционираат Кисела Вода како сè поатрактивна средина за инвестирање.
-Средбата помина во конструктивна атмосфера, во која двете страни разменија идеи за продлабочување на економската соработка меѓу локалната самоуправа и деловниот сектор. Разговорите беа насочени кон иницијативи за унапредување на приватниот сектор, реализација на проекти од областа на заштитата на животната средина, развој на лесната индустрија и создавање одржливи услови за економски раст, соопштија од Општина Кисела Вода.
Претставниците на МАТТО, се вели во соопштението, ја потврдија својата подготвеност за понатамошно институционално партнерство и заедничко создавање можности што ќе придонесат за унапредување на локалната економија и долгорочен развој на Општина Кисела Вода.
