Министерката за финансии Гордана Димитриеска–Кочоска им порачa на граѓаните дека измените на законот за ДДВ нема да донесат никакви нови трошоци за онлајн нарачките од платформи како Тему. Според неа, пратките и понатаму ќе пристигнуваат без дополнителни плаќања, затоа што ДДВ е веќе пресметан и вклучен во конечната цена што ја плаќаат корисниците при нарачка.
Таа објасни дека моделот на наплата на ДДВ за ваквите пратки функционира преку електронски систем со кој меѓународните платформи го пресметуваат и уплаќаат данокот уште во моментот на купување. Со тоа, вели министерката, се избегнуваат дополнителни административни процедури и непланирани трошоци за граѓаните при пристигнување на пратките.
Целта на законските корекции е усогласување со европските директиви, без да се наруши досегашната пракса за малите пратки. Министерството очекува со новите законски доуредувања да се зголеми ефикасноста на наплатата, но без никакво финансиско оптоварување за корисниците кои купуваат од странство.
