Со двојно повеќе инвестиции до поквалитетно и поефикасно здравство.Владата нема да отстапи од планот да го зајакне јавното здравство во Македонија. Ќе се вложува во нови болници и клиники, современа медицинска опрема и вработување на стручни кадри. Според премиерот Христијан Мицкоски хаосот што владее изминатите години, ќе се решава етапно, но сигурно. Тој ветува дека ефектите од државните инвестиции во овој ресор, граѓаните ќе ги почувствуваат наскоро. Најави сериозни реформи и повика надлежните институции да ги пронајдат мешетарите кои го рушат имиџот на здравството.
“Ќе има сериозни реформи, и структурни, но и квалитативни, и убеден сум дека за неколку години од денеска ќе имаме комплетно нова претстава во здравството. Бидејќи често пати зборувам, ќе го повторам тоа и денеска, дека како Влада одвојуваме за здравството повеќе од една милијарда евра. Нешто што досега никогаш не било ни приближно толку направено. Да речеме само во годината за време на ковидот таа бројка била некаде околу 500-550 милиони евра. Значи сега сме, би рекол, два пати повеќе. И повторно имаме проблеми. И тоа е нешто коешто нас не вознемирува” – вели Христијан Мицкоски, претседател на Влада.
Министерот за здравство вели дека периодов интензивно се вложува во еден од најзначајните сектори во државата и дека спроведените реформи даваат резултати.
Се вложува и во апаратура. Клиниката за хирушки болести Свети Наум Охридски од Владата доби нови апарати за магнетна резонанца со што ќе се прават најмалку 5.000 прегледи годишно. За неколку недели оваа дијагностика ќе биде ставена и на “Мој термин”.
“Ако во претходниот период со оној апарат кој сме го имале и бил стар 16 години и сме правеле 4.000 магнетни резонанци на годишно ниво, тоа подразбира дека очекуваме дека со новиот апарат да правиме најмалку 5.000, а тоа се зависи од бројот на смени во кои ќе се работи”, изјави директорот на Клиниката за хируршки болести „Св. Наум Охридски“, д-р Небојша Настов.
Следните неколку крупни проекти во здравството се изградба на нови болници во Штип Тетово и Кичево, но и нова зграда на Медицински факултет со нов студентски дом.Овие проекти ќе се реализираат со пари од првата фаза од британскиот договор.
