На 27 ноември започнува судењето на турскиот државјанин Кадир Кара, кој пред половина година, во кафе бар на Градскиот плоштад во Штип, со неколку истрели од пиштол, го уби друг турски државјанин.
Тој е обвинет за кривичните дела убиство и неовластено изработување, држење оружје и експлозивни материи. Кара, во Основниот суд во Штип, ќе им се суди и на уште четворица турски државјани кои се товарат за соучесништво и помагање.
Убиството се случи на 8 мај во кафе бар во Штип, кога убиецот, додека седел во локалот, брутално со неколку куршуми го застрелал својот соговорник. Веднаш потоа, со помош на четворицата осомничени, убиецот се дал во бегство, но кај наплатната рампа Миладиновци, полицијата успеала да ги фати и приведе.
Тројца од осомничените имале престојувалиште во Штип, додека извршителот на убиството и еден од помагачите биле без пријавен престој, односно во државата влегле само со една цел – да го егзекутираат 25-годишниот поранешен турски студент.
