Во финална фаза е реконструкцијата на основното училиште во село Радање. Зградата, стара повеќе од осум децении, првпат се обновува целосно. Се заменува старата дотраена конструкција со современ и безбеден објект. Градоначалникот на Општина Карбинци, Виктор Паунов, вели дека проектот е во завршна фаза, а со кој ќе се обезбедат подобри услови за учениците и наставниот кадар.
-Ние веќе имаме низа од проекти кои што се во фаза на завршување. Во една таква фаза е и училиштето во село Радање, кое што е предмет на реконструкција од една навистина стара зграда, повеќе од 80 тина години, која што беше во една лоша состојба. За прв пат се целосно обновува и ќе добие еден модерен лик и функционална зграда, која што ќе биде за учениците и за персоналот, односно наставниот кадар, изјави Паунов.
Тој додаде дека во Општина Карбинци се работи интензивно и на неколку нови инфраструктурни проекти. Во тек се активности во селата Таринци и Карбинци, а започна и уредувањето на речното корито на Козјачка река.
-Понатаму имаме еден поголем инфраструктурен проект, а тоа е во селото Таринци,кој наскоро ќе биде завшрен, тоа е улица од 560 метри исто така е предмет на финансирање од страна на Владата. Веќе се завршени и тротоарските површини во село Карбинци и покрај општината, а во почетната фаза е и речното корито на Козјачка река, која што исто така ќе се канализира и ќе се уреди. Граѓаните можат да очекуваат многу нови проекти во делот на патната инфраструктура, образованието, како и спортот, вели Паунов
Тој најавува дека во наредниот период ќе следуваат нови инвестиции во патната и образовната инфраструктура, но и во спортот.
