Поголема трговска размена со Бугарија и земјите во регионот, пообемен карго транспорт, зголемени приходи на Македонски Железници, побрз транспорт на патници. Придобивките од железничкото поврзување со Бугарија се многукратни. Аналитичарите велат дека е добро што со потпишувањето на договорот за изградба на заеднички железнички тунел близу преминот Деве Баир се откочува изградбата на пругата на Коридор 8. За да забрзаат градежните работи на терен силно лобираат НАТО и Европската унија, која пак целосно го финансира проектот за меѓуграничниот тунел.
Од предолги тендерски постапки, избор на изведувачи без доволен капацитет, дополнителни и непредвидливи работи во текот на градбата, преку зголемена потреба за експропријација, до недоволно машини, опрема и луѓе – сите овие причини доведоа до пролонгирања и пробивања на роковите. Третата фаза од Крива Паланка до Деве Баир е најпроблематична поради непристапниот терен – велат експертите. Проектирањето на трасата од 24 километри траело дури 8 години. Токму поради тоа што не се знае на каков карпест предел ќе се наиде и од каков состав е, не можело точно да се утврди цената на чинење на заедничкиот тунел и колку тој ќе чини. Цената ќе зависи од големината на попречниот пресек на тунелот, составот на карпите и дали ќе се наиде на подземни води. Поради должината на тунелот од два и пол километри ќе треба да се направи и галерија за евакуација. На глобално ниво, цената на ваквите проекти достигнува и до 50 милиони евра за километар.
Железничкиот коридор 8, се гради во три фази и досега трае повеќе од една деценија. Првата фаза од Куманово до Бељаковце се градеше 11 наместо 3 години и конечно беше пуштена во употреба во јануари годинава. Втората фаза од Бељаковце до Крива Паланка треба да заврши во октомври 2026-та, но Владата не е задоволна од динамиката на градење на изведувачот. Предизвиците на оваа траса треба тековно да се надминуваат. За најсложената трета фаза од Крива Паланка до граница, во декември ќе с ераспише тендер за изведувач и предвидено е да чини 560 милиони евра. Граѓаните и фирмите чекаат на железничко поврзување со Бугарија од независноста на државата досега.
