Во услови на забрзан раст на домашната економија и забавување на инфлацијата, банкарскиот систем ја задржа стабилноста, солвентноста се подобри, а стапката на адекватност на капиталот достигна 19,6 проценти, што е највисокото ниво од 2006 година, констатира Советот на Народната банка, кој на редовна седница, го усвои Извештајот за ризиците за банкарскиот сектор за вториот квартал годинава
Централната банка денеска соопшти дека ликвидноста на банкарскиот систем се задржал на задоволително ниво и оти ликвидните средства покриваат значителен дел од краткорочните обврски и од депозитите на домаќинствата.
И квалитетот на кредитното портфолио се подобрил во овој квартал, при што стапката на нефункционални кредити се намалила на историски најниското ниво од 2,4 проценти.
– Во услови на олеснети кредитни стандарди и зголемена кредитна побарувачка, зајакнатата солвентност го поддржа побрзиот раст на кредитирањето на домаќинствата и на претпријатијата, којшто на квартална основа изнесува 3,1 процент и 4,3 проценти, соодветно. И депозитите растеа побрзо во вториот квартал од годината, при што и натаму има поволни движења според валутата и рочноста на депозитите, информира Народната банка.
Најавуваат дека и во иднина ќе бидат внимателни во водењето на монетарната и макропрудентната политика, во време кога, укажуваат, сè уште има изразена надворешна и домашна неизвесност. Се нагласува потребата од претпазливост и постојано следење на ризиците заради задржување на стабилноста на банкарскиот сектор и во наредниот период.
Советот на Народната банка ја усвоил и Рамката за одржливост со што се поставува основата за систематско воведување одржливи практики во секојдневното работење. Рамката за одржливост има за цел да придонесе кон поголема енергетска ефикасност, одговорно користење на ресурсите, поттикнување зелени финансии и намалување на јаглеродниот отпечаток, како и кон подигање на свеста и зајакнување на капацитетите на вработените во областа на одржливото работење. Со нејзиното усвојување, Народната банка најавува дека ќе продолжи со активностите насочени кон унапредување на еколошките практики, финансиската писменост и одговорното делување, заради долгорочна економска стабилност и општествена благосостојба.
