Под мотото „Вклучи одржливи навики“ од понеделник до четврток во спортската сала „Борис Трајковски“ ќе се одржува Меѓународниот саем за енергетика и технологија „Енерго – Технома 2025“. Годинава, саемот ќе обедини повеќе од 40 реномирани изложувачи од државава и регионот, а главниот фокус ќе биде ставен на одржливите решенија, технолошките иновации и придобивките.
Саемската манифестација ќе се одвива на површина од 2.500 метри квадратни, а изложувачите ќе презентираат производи и технологии од различни индустриски сектори, вклучувајќи енергетски постројки и опрема, системи за греење и ладење, соларна енергија, хибридни технологии, трансформаторски и климатизациски решенија, како и иновации од областа на роботиката и интелигентните системи.
Во текот на четирите дена ќе бидат организирани и над 20 стручни презентации и практични демонстрации, а дел од саемот се и младите иноватори од техничките факултети, кои ќе се претстават со нивните иновативни решенија.
Според организаторите, саемот претставува одлична можност за промоција на најновите енергетски ефикасни производи и за остварување контакти и добивање директен фидбек од посетителите.
– Годинава „Енерго-Технома 2025“ ќе го надмине форматот на класичен саем, на едно место ќе се соединат иновациите, науката, индустријата и јавноста. Саемот ќе понуди многу повеќе од изложбени штандови, ќе понуди идеи, партнерства и инспирација за иднината. Посебно сме горди што годинава ставаме акцент на одржливите решенија и вклучувањето на младите иноватори во целата манифестација, изјави Даниела Глигоровска, извршен директор на „Скопски саем“, на денешната средба со новинарите.
Една од темите за кои ќе се разговара е и циркуларната економија. Ќе има пет панели на кои ќе бидат прикажани македонскиот позитивни примери и позитивни примери од регионот, а ќе се разговара и за пристапот до финансии.
– Воведувањето на циркуларноста не е процес којшто започнува од некоја далечна иднина. Може да започнеме од самата фаза на креирање на производот и да ги одбереме токму оние ресурси кои имаат можност да се рециклираат. Така што секој чинител во економијата треба да започне тука, сега и веднаш – да види каков тип на ресурси користи и дали може да ги замени за друг тип на ресурси кои што се циркуларни, вели Александар Стамболиев од EIT Community Hub – Бизнис акселератор УКИМ.
Добар дел од големите компании, како што посочи, веќе применуваат сериозна циркуларност во нивното работење. Покровител на саемот е Министерството за енергетика, рударство и минерални суровини. Најавено е присуство на министерката за енергетика Сања Божиновска на официјалното отворање на саемот во понеделник во 18 часот.
Само во понеделник саемот ќе биде отворен од 13 часот, а останатите денови од 10 до 18 часот.. Последниот ден ќе биде отворен до 17 часот. Саемот се одржува втора година по ред откако имаше пауза за време на Ковид кризата, а претходно се одржуваше на просторот на поранешниот Скопски саем.
