Иако календарски сè уште е есен, денеска Македонија се разбуди со сцени што повеќе наликуваат на декември, отколку на почеток на октомври. На превојот Стража падна првиот снег за оваа сезона, создавајќи зимска глетка која изненади многумина. Возењето на овој дел од патот е отежнато, а снежна покривка е забележана и во скијачките центри Попова Шапка и Маврово.
Фотографии и видеа од побелени патишта веќе се споделуваат на социјалните мрежи, а ситуацијата дополнително се комплицира поради ниските температури и маглата. Граѓаните сè уште не ги имаат подготвено возилата со зимска опрема, со оглед на тоа што таа станува задолжителна дури од 15 ноември. Затоа, апел до сите возачи да внимаваат при возење на планинските превои.
Од Управата за хидрометеоролошки работи информираат дека утре доаѓа влажен и студен бран од север, кој и во наредните денови ќе го задржи нестабилното време. Според прогнозата на УХМР, и утре нè очекува облачно и студено време со врнежи од дожд, кои на планините ќе преминуваат во снег. Поради дополнително спуштање на студен воздух, можна е појава на снег и на некои од повисоките места во земјава.
