Пожарите што се случуваат на депониите Дрисла и Вардариште, магацинот за електронски отпад во Трубарево, а за кои има индиции дека се предизвикани од човечки фактор, се лоцирани на објекти од ист вид, односно дејност, и се случуваат во многу краток временски интервал, што може да укажува и на една посериозна криминална појава организирана од страна на организирана криминална група, смета проф. д-р Марина Малиш-Саздовска, експертка за еколошки криминалитет и меѓународна заштита на животната средина.
Во интервју за весникот Нова Македонија таа вели дека сè уште е рано да се дефинираат конкретни криминални поведенија, бидејќи предистрагата е во тек, но оваа појава може да има и одредени облици на еколошки тероризам. Имено, под еколошки тероризам, односно тероризам против животната средина, се подразбира уништување на животната средина со цел заплашување, принуда и сл.
„Сведоци сме дека има појава на страв и загриженост кај населението, особено за состојбата со загаденоста на воздухот, но и за загаденоста на почвата во делот на земјоделските површини. Доколку тоа се докаже во наредниот период, ќе биде потребно во рамките на криминалистичката истрага да се применат сите оперативно- тактички мерки и истражни дејства со цел утврдување на идентитетот на сторителот/сторителите и поднесување квалитетна кривична пријава,“ вели таа.
