Во живо на Фејсбук ловеше дивоградби низ Чаир, а додека Скопје се гуши поради серијата пожари на депониите, никаде ја нема. Во време кога главниот град се соочува со сериозна еколошка криза Данела Арсовска исчезна од јавноста.
Сепак, за разлика од претходно се одважи да одговори на прашањата на Алфа, но како по обичај вина гледа кај сите освен кај себе.
Градоначалничката вели дека таа во нејзиниот мандат во целост го ичистила делот од Вардариште кој бил под нејзина надлежност, за се друго одговорна била Општина Гази Баба.
Надлежност има и Министерството за животна средина кое со Државниот инспекторат може да делува за санкционирање на истите сторители како и општината. Дополнителна надлежност за дивите депонии и потпалувачите на отпад има и Министерството за внатрешни работи. Одговорност треба да барате кај тие кои ги палат, но и кај МВР што не можат да ги најдат ниту санкционираат сторителите, вели Данела Арсовска за Алфа.
За Дрисла која е директно и целосно под нејзина надлежност, како и за другите проблеми градоначалничката немаше коментар.
Во преписката со СМС пораки ја прашавме и каде е и зошто не се појавува пред скопјани во овие критични моменти.
Зошто не сум Орце да правам ПР, ние немаме време за сликање додека се справуваме со пожарите заедно со Противпожарната бригада на Град Скопје, одговори Арсовска.
Случајно или не, веднаш откако заврши со преписката со нас, Арсовска конечно се огласи и на Фејсбук каде повторно проблемот го лоцираше кај сите освен кај себе.
Инаку едно од ветувањата со кои градоначалничката дојде на власт беше и дека во првите 82 дена од нејзиниот мандат ќе ги исчисти сите депонии на територијата на Град Скопје. Сега на помалку од два месеца пред да си замине, ситуацијата е многу полоша отколку пред 4 години.
