Со термални камери, полициски патроли, поголем број на механизација камиони, багери болдожери – надлежните со сите сили се борат да го скротат чадот во Дрисла. Активно се затрупуваат кртичните точки на депонијата. Има два земјени патишта кои се изработени вчера и го олеснуваат пристапот на механизацијата до критичниот дел. Првиот човек на Дирекцијата за заштита и спасување се сомнева дека пожарот е подметнат. Нема никој осомничен од вработените во Дрисла, но сепак на разговор во полиција се повикани директорот на претпријатието Самир Хусени и неколку вработени.
“Во овој момент напредуваме добро и очекувам во текот на денешниот ден добар дел од ова место да биде целосно затрупано. Побарав дополнителна механизација затоа што како што напредуваме со овие земјени патишта се отвора простор за поширок фронт за работа, за повеќе машини. Ангажирани се и повеќе патроли на полицијата, кои патролираат во околината и овде на депонијата „Дрисла“ и на депонијата Вардариште”, рече Ангелов.
Додека Дрисла се уште чади, во дивата депонија Вардариште нема горење ниту чадење, но продолжува затрупувањето на критичниот канал во кој претходно се разви пожарот.
Веќе петти ден од Дрисла излегува густ бел чад со силна смрдеа, во вечерните и утринските часови најмногу се чуствува во околните населени места. Инспекциската постапка за горењето на депонијата е во тек и се следат сите мерки за евалуација на влијанието и отстранување на последиците од пожарот. По пожарот во „Вардариште“, жителите на Аеродром и други општини секој ден во 18 часот ја блокираат раскрсницата меѓу булеварите „АСНОМ“ и „Србија“, а протестите ќе продолжат додека не се реши проблемот.
