Министерот за надворешни работи и надворешна трговија, Тимчо Муцунски, во рамки на работната посета на Женева, во седиштето на Светската трговска организација оствари конструктивна средба со генералната директорка Нгози Оконџо-Ивеала.
Директорката ги поздрави економските и надворешно-трговските политики на македонската влада поврзани со странските инвестиции, пазарот на трудот, отвореноста на економијата, како и усогласеноста на државата со рамката на Светската трговска организација.
Муцунски истакна дека економските реформи се високо на агендата на владата и ја нагласи посветеноста за трансформација на економијата во согласност со побарувачката на пазарот на труд и глобалните трговски пазари. Тој подвлече дека привлекувањето странски инвестиции е силен приоритет, особено во секторите енергетика, фармација, одбрана и други области каде што државата може да покаже високо ниво на конкурентност.
„Силниот ангажман на владата за привлекување на странски инвестиции, членството во НАТО и целосната усогласеност со заедничката надворешна и безбедносна политика на ЕУ се потврда дека државата е доверлив партнер и атрактивна локација за инвестирање. Ова дава резултати преку зголемен обем на реализирани странски инвестиции и позитивни економски показатели во делот на извозот“, нагласи Муцунски.
Двајцата соговорници се согласија дека интеграцијата на Западниот Балкан е неопходно да добие поголема динамика, бидејќи тоа ќе значи реализација на нови стратешки проекти, поголем прилив на инвестиции, забрзан економски развој на државите и отворање пристап до нови пазари за домашните компании.
Муцунски на средбата говореше и за новите надлежности на Министерството за надворешни работи и надворешна трговија, кое сега е одговорно за процесите, политиките и регулативата поврзани со надворешната трговија. Тој најави дека активно учество и засилената соработка со Светската трговска организација ќе бидат еден од приоритетите во следниот период.
