Македонските училишта на располагање имаат нова „алатка на иднината“ – прв водич за употреба на вештачка интелигенција во образованието.
На 120 страници се опфатени над 70 алатки што можат да ја променат наставата – од математика и природни науки, до јазици, литература и општествени предмети. Преку практични примери, наставниците ќе можат да создаваат посовремени содржини, а учениците ќе научат како да ја користат вештачката имтелигенција етички и безбедно.
“Како да се користат алатките по одделни области – математика, природни науки, јазици и литература, историја и општествени науки. Како да се препознаваат можни злоупотреби на податоци и слично. Во суштина, содржи препораки што се наменети за наставниците, стручните соработници и за учениците,” подвлече министерката Весна Јаневска.
Водичот, освен што нуди конкретни решенија за часот, предупредува и на можни злоупотреби – од манипулација со податоци до ризици за приватноста.
“Голем дел од овој водич е посветен токму на учениците. Во него се дадени практични примери за тоа како да се препознаваат и оценат алатките базирани на вештачка интелегенција, како да се креираат образовни содржини на на ефикасен и ефективен начин. Дадени се конкретни примери употреба на алатките во наставните предмети, како што кажа и министерката вклучувајќи и математика и природни науки, јазици литература и општествените науки.”- изјави Деканот на Факултетот за информатика, Универзитет „Гоце Делчев“ – Штип Сашо Коцески.
Електронската верзија наскоро ќе ја добијат сите училишта, а Министерството заедно со факултетите и Бирото за развој на образованието најавија и обуки за ментори, кои ќе го пренесуваат знаењето на наставниците. Во тек е и јавен повик за професори од средните училишта, во рамки на партнерството со групацијата „Бреинстер“.
