Македонската индустрија продолжува да се развива со позитивни чекори. Раст на индустриското производство од 4,1 проценти во јули годинава во однос на истиот месец лани, покажуваат податоците на Државниот завод за статистика. Зголемувањето најмногу е забележливо во секторот преработувачка индустрија. Најголем раст има во делот на производство на моторни возила, приколки, полуприколки со 26,5 проценти, производството на електричка опрема со 15,3 проценти, производство на машини и уреди со 4,6 проценти.
-Зголемувањето во секторот Преработувачка индустрија е резултат, пред сѐ, на зголеменото производство во следните оддели: Производство на тутунски производи, производство на текстил, производство на облека, печатење и продукција на снимени медиуми (записи), производство на производи од гума и производи од пластични маси, производство на други неметални минерални производи, производство на фабрикувани метални производи, освен машини и опрема, производство на електрична опрема, производство на машини и уреди, неспоменати на друго место, производство на моторни возила, приколки и полуприколки и производство на мебел, соопштија од ДЗС.
Доказ дека индустријата ја враќа кондицијата е и самиот индекс на индустриското производство за првата половина од годинава, каде се бележи раст од 2,8 проценти раст во однос на истиот период лани. Најголем, речиси двоцифрен раст е забележан во мај. За разлика од истиот месец минатата година тој е повисок за дури 9,4 проценти.
Меѓу секторите каде што во јули се бележи пад на динамиката е секторот рударство и вадење камен, каде во однос на јули лани, има опаѓање од 10,4 проценти/ Исто така и во секторот Снабдување со електрична енергија, гас, пареа и климатизација каде намалувањето изнесува 7,5 проценти.
Матеја Петровски
