По повод националниот празник Илинден, честитка до сите Македонци, каде и да се, упатија единствената македонска партија во Албанија – Македонска алијанса за европска интеграција (МАЕИ) и македонските друштва во Албанија, порачувајќи дека Илинден е симбол на непокорот, единството и достоинството на македонскиот народ.
На овој ден, се поклонуваме пред сите херои кои се жртвуваа за македонската слобода, и ги повикуваме сите Македонци на единство, истрајност и решителна заштита на нашиот национален идентитет. Нека е честит и вековит Илинден! Да живее македонскиот народ! Да живеат Македонците во Албанија – се наведува во честитката на единствената македонска партија во Албанија, Македонска алијанса за европска интеграција (МАЕИ).
Македонското друштво „Преспа“ – Пустец, во честитката наведува дека „Илинден е нашиот завет на достоинство, крвта што чука во срцето на секој Македонец“.
Најголемиот македонски празник го честиташе и Македонското друштво „Илинден“ – Тирана, порачувајќи: „Да го почитуваме и славиме овој голем ден во чест на Илинденското востание од 1903 и големиот Илинден 1944 година“, при што објавува и фотографија од излет на Македонците во Тирана во 1937 година.
Честитка упати и Панди Јани, познат активист за правата на Македонците и локален лидер на Партијата на слободата за Пустец.
