По екстремно жешкиот јулски викенд, Македонија денеска влегува во фаза на дестабилизација на атмосферата, како резултат на судир на многу топлиот воздух од југ со поладна воздушна маса што навлегува од северните предели на Балканот.
Попладневните и вечерните часови ќе донесат услови за локално невреме, посебно во планинските предели. Се очекува развој на нестабилна облачност, пороен дожд, грмежи, силни електрични празнења, засилен ветер со брзина од над 60 километри на час и појава на град. Скопскиот регион, иако нешто помалку подложен, исто така ќе биде под влијание на оваа нестабилна воздушна маса, со услови за краткотрајни, но интензивни поројни дождови, грмежи и засилен ветер. Метеоролозите апелираат до граѓаните да избегнуваат престој на отворено и под дрвја во текот на невремето. Според прогнозите, од среда конечно не очекува разладување, со пониски температури и северен ветер.
