Премиерот на Владата на Република Македонија, Христијан Мицкоски, заедно со Премиерот на Обединетото Кралство, Кир Стармер, објавија дека Владите на Република Македонија и Велика Британија, постигнале согласност за Договор за стратешко партнерство на Обединетото Кралство на Велика Британија и Северна Ирска со Република Македонија
Ете, тоа е имање на визија во политиката и нејзино конкретно остварување. Тоа е лидерство. После минатогодишното зближување со тимот на претседателот на САД, Доналд Трамп, и најавата за блиска и плодна политичка и економска соработка од неколкуте остварени средби на премиерот и членови на владата на Р.М. со најблиските соработници на Трамп, еве сега на Самитот на Европската политичка заедница во Тирана, добиваме информации за постигнат договор за стратешка соработка со Обединетото Кралство. Тоа за нас и регионот е настан од историско значење. Тоа е договорена соработка со една од најголемите светски сили на политички, економски, финансиски план.
Сите знаеме дека Велика Британија е земја со најдобро организирана дипломатија, дека заедно со САД нејзините политики се највлијателни во меѓународната заедница и неспорен е фактот дека Лондон е светски финансиски и културен центар. Многу битен е и фактот што Лондон е и светски центар на модерните и креативни индустрии, кои на нас како мала држава ни се повеќе од потребни. И сега, повторно, што значи за Р.М. овој стратешки договор?
Пред се, стратешкиот договор значи шанса, прилика и конкретна можност за добивање на британска експертиза, стратешки реформи, финансиска поддршка и помош и секако најконкретни и неопходни инвестиции, во повеќе области, а особено во енергетиката и иновациите. Понатаму, сето ова отвара конкретни перспективи за соработка и поддршка во многу важни области за севкупниот развој на Македонија, како што се економијата, инфраструктурата, образованието, здравството, транспортот, безбедноста и сл. Секако, не треба да се занемари и можноста за засилен политички дијалог и потребна координација на планот на глобалните безбедносни предизвици, во рамките на меѓународните организации.
Е па, мои почитувани Македонци ова не е мала работа. Ова е потврда на дефиницијата дека политиката е уметност на можното и неможното. Еве, и едното и другото го имаме од Владата на Република Македонија, предводена од Христијан Мицкоски и коалицијата на ВМРО-ДПМНЕ, ВРЕДИ и ЗНАМ.
А на душебрижниците наши и странските недобронамерници, кои веќе оркестрирано го напаѓаат стратешкиот договор, да им кажам дека Обединетото Кралство не е Тајван. Шест милијарди евра инвестиции за Македонија од Обединетото Кралство, претставуваат голем пријателски гест и уште поголема конкретна поддршка за сестран развој и напредок на Македонија, пишува во својата анализа познатиот аналитичар Сотир Костов.
