Обвинетиот газда на „Пуцко Петрол“, Асмир Јахоски, излегува од притворот во Шутка со гаранција од над два милиони евра. Апелацискиот суд објави дека ја прифатил неговата жалба во однос на неговото претходно барање да биде ослободен од зад решетки со гаранција во пари и имот.
„Решението на Основниот кривичен суд Скопје го преиначи на начин што ја укина мерката притвор определена спрема осомничениот А.Ј. со прифаќање гаранција во износ од 986.540 евра, во денарска противвредност со ставање хипотека на недвижен имот во корист на Македонија и износ од 72.000.000,00 денари готови пари, во корист на Македонија“, се вели во соопштението на Апелацискиот суд.
На Јахоски му е одземен пасошот и сега има обврска повремено да се јавува во суд. Судот вели дека ја прифатил жалбата затоа што обвинителството претходно дало позитивно мислење дека Јахоски може да излезе од затвор, но не само со милион евра во имот како што понудил, туку со дополнителни милион на сметка во банка, гаранција што тој ја обезбедил.
Инаку, Јахоски е осомничен во случајот „Адитив“, кој претставува еден од најголемите скандали поврзани со јавни набавки и организиран криминал во Македонија во последните години. Станува збор за корупциска афера поврзана со набавка на адитиви за јаглен за потребите на РЕК Битола и за РЕК Осломеј, во која се инволвирани високи службеници и бизнисмени.
