За жал Али Ахмети изгледа се уште живее во минатото. Заканите на лидерот на ДУИ со кои директно удира по правосудниот систем и се заканува дека ќе извадел народ на улица за протести, ако Обвинителството реши да поднесе обвинение за поранешниот министер за економија Крешник Бектеши за големата трагедија во Кочани, според премиерот Христијан Мицкоски се доказ дека на Ахмети тешко му паѓаат опозициските денови, а со закани се обидува да ги спасува своите соработници кои на грбот на граѓаните станале милионери минативе години.
-Да гледаме во иднината, а не во минатото. За жал господинот Ахмети изгледа се уште живее во минатото, затоа што ако живее во сегашноста ќе може да направи огромна материјална разлика помеѓу минатото и луѓето од минатото и сегашноста во која што тој е во опозиција, а околу него има многу милионери кои што на грбот на граѓаните во Македонија се збогатија, изјави Мицкоски.
Осуда за заканите на Ахмети испрати и првиот човек на СДСМ, Венко Филипче. Според него правото на протест не смее да се користи во политички цели. Но, сепак не исклучува можна соработка со ДУИ на локалните избори. Во моментов траеле преговорите со другите политички субјекти и за брзо ќе се знаело како социјалдемократите ќе настапат на изборите во октомври.
-Сметам дека правото на протест е уставно загарантирано, меѓутоа апсолутно не сметам дека треба да се злоупотребува во политички цели. Ние веќе го започнавме процесот на разговори и пронаѓање на партнери за следниот период, циклусот на локални избори, еден дел од преговорите веќе постепено се заокружуваат, други траат, трети допрва ќе почнат, изјави Филипче.
Директна осуда за заканите за дестабилизација упати и Демократскиот сојуз. Од таму ги повикуваат надлежните органи да преземат решителна акција за спречување на безбедносно политичка криза, каква што има намера да предизвика Ахмети. Од партијата на Павле Трајанов велат дека таква мафијашка уцена и притисок врз Обвинителството и судовите е невидена во Македонија.
Матеја Петровски
