Министерот за спорт, Борко Ристовски, изрази силна поддршка за продолжување на прекинатото кошаркарско првенство, истакнувајќи ја важноста на судиите и делегатите, кои одлучија да штрајкуваат поради неисплатени долгови од КФМ, за време на целиот натпреварувачки процес.
На средбата со претседателот на Судиската организација, Алија Феревски, и комесарот за натпреварувања, Александар Милојевиќ, министерот упати јасна порака дека институциите се подготвени да преземат конкретни чекори за стабилизација на ситуацијата.
„Како министер за спорт, целосно ја разбирам и поддржувам важноста на судиите и делегатите и ги уверувам дека сите заостанати обврски ќе бидат подмирени во најбрз можен рок“, изјави Ристовски.
Тој нагласи дека Министерството е свесно за предизвиците со кои се соочува македонската кошарка и дека продолжувањето на првенството е во интерес на сите – играчите, клубовите, публиката и спортот воопшто.
„Во интерес на кошарката и спортот е натпреварите да продолжат во атмосфера на доверба и исполнување на меѓусебните обврски на сите чинители во кошарката“, истакна министерот.
Од Министерството нагласуваат дека остануваат посветени на следење на ситуацијата и поддршка на конструктивен дијалог меѓу сите страни, за да се надмине застојот и се овозможи фер и регуларен натпреварувачки процес.
