Министерот за здравство, Арбен Таравари, денес ќе ги посети пациентите кои се наоѓаат во болници во Солун и Софија, а кои беа дел од критичната група повредени во трагичната несреќа во Кочани. Според најновите информации, пациентите не се во животна опасност.
На прес-конференцијата пред Ургентниот центар на Клиничкиот центар „Мајка Тереза“ во Скопје, министерот изјави дека сите мерки што зависеле од нас биле преземени.
„Го направивме сè што беше во наша моќ. Нашата задача е да бидеме внимателни и да им обезбедиме најдобра медицинска поддршка. Се надевам дека и нашите пријатели од странство кои ни помагаат, ќе дадат максимум во овие моменти,“ изјави Таравари.
Министерот информираше дека од трите нови пациенти од Кочани, двајца се згрижени во Клиничкиот центар во Скопје, а еден во болницата „8 Септември“.
„Болниците во Кочани и Штип сега се без пациенти, бидејќи ги повлековме сите за третман во Скопје, каде што имаме достапни терцијерни здравствени услуги,“ додаде министерот.
Таравари истакна дека во Скопје се наоѓаат 84 пациенти, а до крајот на денот, уште 26 пациенти ќе бидат испратени во други земји: 4 во Словенија, 4 во Хрватска, 6 во Австрија и 12 во Белград. Во Македонија ќе останат вкупно 58 пациенти.
„Состојбата на пациентите е стабилна. Континуирано добиваме информации од сите болници во кои се сместени,“ дополни министерот.
Во пожарот што се случи во дискотеката „Пулс“ во Кочани, загинаа 59 млади лица, а повеќе од 140 повредени се згрижени во земјава и во странство.
