Вкупно 84 лица, повредени во трагичниот пожар во дискотеката „Пулс“ во Кочани, се згрижени во болниците во Скопје, додека 51 од нив се префрлени во странство за натамошно лекување, информираше министерот за здравство, Арбен Таравари. Според него, состојбата на пациентите е генерално стабилна. До сега, обдукција на 15 лица од загинатите е веќе завршена.
Лекарите продолжуваат да се борат за животите на повредените, додека патолозите ги вршат обдукциите на жртвите. Ова се случува на вториот ден од трагедијата која се одигра во диско клубот „Пулс“ во Кочани, каде животот го загубија 59 млади лица, а најмалку 155 други беа повредени, кога таванот на клубот се сруши поради пожарот за време на концертот на групата ДНК.
„Имам пријателки и пријатели кои загинаа, а многумина се повредени и сега се на лекување во болница во Скопје. Некои се во критична состојба, други не“, изјави за РСЕ 14-годишната Сара, која денес беше во центарот на Кочани, каде се оддаваше почит на жртвите.
Министерството за здравство ја прифати понудената помош од странски земји за згрижување на повредените. Досега, 51 лице е испратено на лекување во шест различни земји.
„На среќа, повредените кои беа пренесени во болниците низ нашата земја се во стабилна состојба. И исто така, пациентите кои беа транспортирани во странство се генерално стабилни. Но, се појавува нов проблем – некои од пациентите кои не се јавиле вчера, денеска започнаа да се јавуваат. Апелирам до сите кои биле присутни на трагичниот настан во Кочани, а кои не се пријавиле вчера, да го сторат тоа денеска“, изјави министерот за здравство, Арбен Таравари, на прес-конференцијата одржана на 17 март.
