Хрватскиот премиер Андреј Пленковиќ утрово разговараше со македонскиот премиер Христијан Мицкоски и изрази длабоко сочувство по трагичниот пожар во Кочани, кој се случи за време на концертот. Според последните информации, во пожарот животот го загубиле повеќе од 50 лица, а над 100 се повредени, потврди хрватската Влада.
„Ги споделуваме вашите болка и тагата по оваа страшна трагедија, која однесе многу млади животи. Нашето срце е со Македонија во овие тешки моменти“, изјави Пленковиќ во писмото со сочувство испратено до Мицкоски.
Пленковиќ истакна дека Хрватска целосно ја поддржува Македонија во овие моменти на болка и страдање.
„Во мое лично име и во името на Владата на Република Хрватска, изразувам најдлабоко сочувство кон вас, македонскиот народ и пред се до семејствата и пријателите на загинатите. На повредените им посакувам брзо закрепнување“, додаде премиерот на Хрватска.
Трагичниот пожар се случи во ноќниот клуб во Кочани, каде што се одржувал концерт. Според министерот за внатрешни работи Панче Тошковски, при пожарот животот го загубиле 59 лица, а повеќе од 100 се повредени. Тошковски додаде дека неколку лица биле приведени, а според првичните информации, пожарот настанал од искра што го запалила таванот на клубот.
