Девет амбасадори треба да почнат да си ги пакуваат куферите и да се вратат во Македонија. Министерството за надворешни работи веќе ги известило за завршување на нивниот мандат. Сега на потег е претседателката која треба да ги потпише указите за нивно отповикување.
“Информираме дека Министерството е во редовна и континуирана комуникација со Кабинетот на Претседателот на државата”– велат од МНР.
Од МНР не откриваат повеќе детали – не ги кажуваат ни причините ни имињата на амбасадорите.
Претседателката Гордана Сиљановска – Давкова објаснува дека целата постапка, до нејзиното завршување, е од доверлив карактер, како што предвидува и законот. Во телевизиско гостување изјави дека јавноста ќе биде информирана кога ќе заврши процедурата.
“Не сум ни креирала јас укази, кога ќе заврши фазата што е од доверлив карактер и кога ќе има укази, ќе може да се коментира… Јас единствен указ што сум потпишала е за повлекување за амбасадорот Жерновски” – изјави Гордана Сиљановска Давкова.
Амбасадорите најверојатно ќе бидат отповикани поради непочитување на законот, односно биле упатени во мисија од претходниот шеф на државата, Стево Пендаровски, без да ги презентираат амбасадорските тези пред собраниската Комисија за надворшена политика.
Неофицијално, на половина од мандатот во земјава се враќаат амбасадорите од Бугарија, Белгија и Црна Гора, додека по само една година амбасадорување се враќаат амбасадорите од Босна и Херцеговина, Шведска, Чешка, Велика Британија и од Постојната мисија при Меѓународните организации. Во Македонија треба да се врати и амбасадорката во Советот на Европа, но поради редовен истек на мандатот.
Ања Лукарова
