Нарушен углед и функционалност на Јавното обвинителство, низа скандали, незаконски постапувања и корупција, неефикасност и повреда на принципите и самостојноста во вршењето на функциите на обвинителите – Министерството за правда ги подготвува аргументите со кои бара разрешување на републичкиот обвинител Љупчо Коцевски.
Во најбрз можен рок, предлогот ќе биде испратен до Советот на јавните обвинители, кои ќе имаат рок од 15 дена да се произнесат. Доколку во тој рок обвинителскиот совет, поради оправдани причини не го достави мислењето до Владата, имаат време уште 15 дена да кажат дали републичкиот обвинител сторил тешка дисциплинска постапка. Ако воопшто не одговорат на предлогот на Илинденска, процесот за разрешување на Коцевски продолжува во Собранието, каде извесно е дека пратениците ќе го разрешат. Премиерот Мицкоски го повика Коцевски сам да си поднесе оставка за да ја скрати процедурата, а републичкиот обвинител рече прво ќе ги разгледа аргументите поради кои се бара негово разрешување и доколку смета дека сторил тешка дисциплинска постапка ќе си замине. Во спротивно ќе ја чека одлуката на политичарите.
