Нема полни корпи, нема редици на касите. Маркетите останаа без муштерии. Алфа направи обиколка низ главниот град и посети неколку ланци на маркети. Во некои забележавме дека нема ниту еден купувач, а во некои само по неколку граѓани кои купуваа по еден или два производи кои им биле најнеопходни.
Кај маркетите во близина на училиштата, беше видлива раздвиженост, но најголем дел од купувачите беа ученици.
И трговците признаваат дека посетеноста им е намалена. Особено тоа го осетиле преку бројот на издадени фискални сметки.
„Велат дека поради бојкотот имале намален дневен промет“.
Граѓаните кои ги прашавме за бојкотот, сметаат дека се испраќа добра порака, но поголемиот дел имаат дилема дали само еден ден бојкотирање може нешто да смени на долг рок. Алармираат надлежните да бидат постојано на терен и да ги зауздаат трговците.
По повикот за бојкот кој наиде на голем аподдршка на социјалните мрежи, дел од трговците уште во текот на вчерашниот ден ги намалија цените на некои од производите и најавија акции со кои значително ќе се намалат цените на основните производи. Цените на производите изминатите месеци посојано се движеа во нагорна линија, по што владата воведе таканаречени празнични кошнички. Но она што предизвика реакција беше наглото зголемување на цените пред да бидат воведени кошничките, по што имаше засилени инспекциски контроли.
Инаку бојкотот започна во Хрватска, а потоа ги поттикна и земјите од регионот. Денеска има бојкот и во Србија, Босна и Херцеговина и Црна Гора.
Љубиша Владимиров
