На првиот ден на Божиќ во село Кучково традиционално се одржа коњаничкиот марш, кој веќе десетта година по ред го организира здружението „Златна потковица“, со помош на општината Ѓорче Петров.
„Овој ден го одбележавме како една традиција коњички марш за време на празникот Божиќ и воедно да оддадеме почит на еден монах кој имал многу заслужено за еден манастир во Кучково. Секоја година имаме од десет до петнаесет коњи што учествуваат на овој марш. Значи да го одбележиме денот како што било на времето по традиција стара“, изјави Миле Трајковски претседател на здружението „Златна потковица“ и организатор на божиќниот коњанички марш.
Десетина коњаници од Ново Село и Кисела Јабука тргнаа од пред школото „Тихомир Милошевски“ и јаваа се до манастирот Свети Ѓорѓија. На некои ова им беше првпат да учествуваат и посакаа настанот да премине во долга традиција.
Најмладиот учесник годинава имаше само 11 години. Коњаниците првата пауза ја направија среде селото во Волково каде беа дочекани со греана ракија и мекици, а додека во позадина се слушаа зурли и тапани локалните жители заедно со девојки во традиционална македонски носи, ги вртеа старите македонски ора.
На крајот коњаниците го продолжија маршот до црквата свети Ѓорѓија, каде ги пречекаа ѓорчепетровци со убава дружба и традиционална трпеза.
Љубиша Владимиров
