„Посакувам во 2025 мирот да биде главната опција и годината што доаѓа да биде година на мировни процеси, порача претседателката, Гордана Сиљановска-Давкова. Претседателката и Врховен командант на Вооружените сили, заедно со Началникот на Генерал штабот, генерал-мајор Сашко Лафчиски, на првиот ден од новата година ги посетија припадниците на Армијата во касарната „Јане Сандански„ во Штип.
„Она што денеска најмногу ме загрижува е што војуваат европски држави. Украина и Русија. Се надевам дека 2025 ќе биде година во која местото кадешто треба да се решаваат проблемите, Њујорк, Обединетите Нации, навистина ќе биде искористено. Се разбира јас, многупати сум рекла и ќе повторам дека мирот и безбедноста, во најголема степен зависат од нашите вооружени сили. Убаво е да знаете дека стоите на чело на Армија, која е почитувана и компатибилна со останатите, иако е мала. Таа е најголем гарант за нашиот мир„ изјави претседателката, Гордан Сиљановска-Давкова.
И годинава по повод новогодишните празници претседателката, донесе одлука за помилување на седум осуденици. Еден од нив потполно, а останатите шестмина, делумно се ослободени од понатамошно извршување на казната. Сепак, според Сиљановска, потребно е да се изготви нов Закон за помилување, кој ќе биде модерен и со воспоставен систем.
„Сегашниот Закон, после неколкуте одлуки на Уставниот суд и не е Закон, во вистинска смисла. Нема систем. Нам ни треба еден модерен Закон за помилување, во којшто повторувам суштината ќе бидат луѓето, затвореници. Бидејќи помилувањето не е квази казна, туку разбирање и отварање на пат за некој друг живот„ изјави претседателката, Гордана Сиљановска -Давкова.
При посетата на штипската Касарна претседателката, Сиљановска, направи обиколка на дел од единиците на Армијата и присуствуваше на тактичко-техничкиот збор организиран од Вториот пешадиски баталјон.
Александра Ристеска
